சென்னை, நவ. 13 –
தமிழ்நாடு ஏஐடியுசி உழைக்கும் பெண்கள் அமைப்பு (இந்திய கம்யூனிஸ்ட் கட்சி) மாநில செயலாளர் வஹிதா நிஜாம் நேற்று வெளியிட்டுள்ள அறிக்கையில் கூறியிருப்பதாவது:–
கள்ளக்குறிச்சி மாவட்ட ஆட்சியர் பத்மஜாவுக்க, அத்தொகுதியின் ஆளுங்கட்சியான த.வெ.க. எம்.எல்.ஏ. அருள் விக்னேஷ் ஆபாசமான குறுஞ்செய்திகளை அனுப்பியதாகவும், அவரது இல்லத்திற்குச் சென்று அத்துமீறி தொல்லை கொடுத்ததாகவும் வெளியாகியுள்ள செய்திகள் பெரும் அதிர்ச்சியை ஏற்படுத்துகின்றன
இந்த சம்பவம் தொடர்பாக, மாவட்ட ஆட்சியரின் கணவரும் விழுப்புரம் மாவட்ட ஆட்சியருமான ஷேக் அப்துல் ரஹ்மான், சம்பந்தப்பட்ட சட்டமன்ற உறுப்பினர் மீது நடவடிக்கை எடுக்கக் கோரி தலைமைச் செயலாளருக்கு புகார் கடிதம் எழுதியுள்ளதாகவும் செய்திகள் வெளியாகியுள்ளன. இந்தப் புகார் தொடர்பான முழுமையான விசாரணையை அரசு உடனடியாக மேற்கொள்ள வேண்டும். குற்றச்சாட்டுகளின் உண்மைத்தன்மையை வெளிக்கொண்டு வருவதற்கு முழுமையான, சுதந்திரமான விசாரணை அவசியம்.
மக்களால் தேர்ந்தெடுக்கப்பட்ட பிரதிநிதி என்பவர் அதிகமான பொறுப்பும், பொது ஒழுக்கமும், கொண்டிருக்க வேண்டியவர். ஆனால், தனது அரசியல் அதிகாரத்தை ஒரு பெண்ணை அச்சுறுத்துவதற்கும் அவமதிப்பதற்கும் பயன்படுத்துவது கண்டனத்திற்குரியது.ஒரு மாவட்ட ஆட்சியருக்கே அரசியல் அதிகாரம் படைத்த ஒருவரால் இத்தகைய தொல்லைகள் ஏற்படுவதாகக் குற்றச்சாட்டு எழும்போது, சாதாரணமான உழைக்கும் பெண்களின் நிலை என்னவாகும் என்ற கேள்வியை எழுப்புகிறது. குற்றச்சாட்டுகள் உறுதி செய்யப்பட்டால் பாரதிய நியாய சம்ஹிதாவின் சட்டப் பிரிவுகளின் கீழ் வழக்குப் பதிவு செய்து நடவடிக்கை எடுக்க வேண்டும்.
எனவே, இந்த விவகாரத்தில் அரசியல் தலையீடு இல்லாத சுதந்திரமான, நியாயமான, காலவரையறைக்குட்பட்ட விசாரணையை உடனடியாக நடத்த வேண்டும். பெண்களின் கண்ணியத்துடன் விளையாடும் எவருக்கும் மன்னிப்பில்லை என்பதையும் அரசியல் செல்வாக்கு சட்டத்தின் பிடியிலிருந்து யாரையும் காப்பாற்றாது என்ற நம்பிக்கையையும்
ஏற்படுத்தக்கூடிய முறையில் அரசு இந்த குற்றச்சாட்டை கையாள வேண்டும். இவ்வாறு அவர் கூறியுள்ளார்.