க்யூட் சி.எம். என்று விஜய்யை பாராட்டியவர்களும், விசில் சின்னத்துக்கு வாக்களித்தவர்களும் புலம்புகிற சத்தம் தமிழ்நாடெங்கும் கேட்கிறது. பண்டிகை நாட் களில்கூட நிம்மதியாக வாழ முடியாத நிலையில் மக்கள் பரிதவிக்கிறார்கள்.
மனிதருக்கு அடிப்படைத் தேவை உணவு. நெற்களஞ்சியமான தஞ்சை மாவட்டம் தரிசாகக் கிடக்கிறது. குறுவைப் பயிரின் சாகுபடி பரப்பு பாதியாகக் குறைந்துவிட்டது. சம்பா பயிருக்குத் தேவையான தண்ணீர் இல்லாததால், நேரடி நெல் விதைப்பு என்ற சோதனைக் கட்டத்திற்கு விவசாயிகள் தள்ளப்பட்டிருக்கிறார்கள். 5 கோடி ரூபாய் செலவு செய்து பயணித்து, மேட்டூர் அணையைத் திறந்து வைத்த முதல்வர் விஜய், டெல்டாவில் வாடும் பயிர்களைப் பற்றிக் கவலைப்படாமல் இருக்கிறார். விவசாயக் கடன்களை முழுமையாகத் தள்ளுபடி செய்வதாக வாக்களித்துவிட்டு, அரைகுறை அறிவிப்புகளை மட்டுமே வெளியிட்டார். பயிர்க் காப்பீட்டுத் தொகைக்கூட கிடைக்காமல் விவசாயிகள் தவிக்கிறார்கள்.
திராவிட மாடல் ஆட்சியில் வேளாண்மை மீதான தனி அக்கறையினாலும், சிறப்பான நீர் மேலாண்மையினாலும் டெல்டா மாவட்டங்களில் சாதனை அளவில் நெல் உற்பத்தி செய்யப்பட்டது. த.வெ.க ஆட்சியின் அலட்சியத்தால் நெற்களஞ்சிய விவசாயிகள் கண்ணீரில் மிதக்கிறார்கள். உழுதவன் கணக்குப் பார்த்தால் உழக்குக் கூட மிஞ்சாது என்ற பழங்கதையைப் புதுப்பித்திருக்கிறது விஜய் அரசு. உழவர்கள் மட்டுமல்ல, உண்பவர்களும் கண்ணீருடன் கணக்குப் பார்க்கும் நிலைதான் தமிழ்நாட்டில் உள்ளது.
6 மாத கால ஆட்சியில் அனைத்து வகையான அத்தியாவசியப் பொருட்களின் விலையும் உயர்ந்துவிட்டது. ஒரு கிலோ அரிசி விலை, முன்பைவிட 30 ரூபாய் உயர்ந்து, கிலோ 100 ரூபாய் என்ற நிலையை நெருங்கிக் கொண்டிருக்கிறது. தரமான அரிசியை விலை கொடுத்தாலும் வாங்க முடியாத நிலை உள்ளது. த.வெ.க அரசோ இதையெல்லாம் கண்டுகொள்ளாமல், கூட்டுறவு அங்காடிகளில் சன்னரக பொன்னி அரிசி ஒரு கிலோ 30 ரூபாய்க்கு விற்பனை செய்வதாகத் தம்பட்டமடித்தது. 100 ரூபாய்க்கு நல்ல அரிசி கிடைக்காத நிலையில், 30 ரூபாய்க்கு பொன்னி அரிசியா என்ற எதிர்பார்ப்புடன் சென்ற மக்களுக்கு ஏமாற்றம்தான் மிஞ்சியது.
தமிழ்நாட்டில் அரிசி அட்டைதாரர்களுக்கு ரேஷன் கடை மூலம் 20 கிலோ அரிசி வழங்கப்படுகிறது. முத்தமிழறிஞர் கலைஞர் ஆட்சிக்காலத்தில் 2006ஆம் ஆண்டு செப்டம்பர் 15ஆம் நாள் ஒரு கிலோ அரிசி 2 ரூபாய் என்ற விலைக்கு வழங்கும் திட்டத்தைத் தொடங்கினார். பின்னர், அதை கிலோ 1 ரூபாய் என்று குறைத்தார். பிறகு வந்த ஆட்சியில் அந்த விலையையும் நீக்கம் செய்ததால், ஒவ்வொரு குடும்பத்திற்கும் 20 கிலோ அரிசி கட்டணமில்லாமல் வழங்கப்பட்டு வருகிறது. திராவிட நாயகரான கழகத்தலைவரின் திராவிட மாடல் ஆட்சியிலும் 20 கிலோ அரிசி தடையின்றி வழங்கப்பட்டது.
மக்களுக்கு கட்டணமில்லாமல் வழங்கப்படும் ரேஷன் அரிசியை பாலீஷ் செய்து, சன்னரக பொன்னி என்று ஏமாற்றி, கூட்டுறவு அங்காடிகளில் 30 ரூபாய்க்கு விற்பனை செய்த மோசடிக் கூட்டம்தான் த.வெ.க. ஆட்சியினர். பொன்னி அரிசி என நம்பி, விலை கொடுத்து வாங்கிய பொதுமக்களே மாவட்ட ஆட்சியர்களிடமும், அதிகாரிகளிடமும், “இது பாலீஷ் போடப்பட்ட ரேஷன் அரிசி” என்று முறையிட்ட வேதனைக் காட்சிகளைத் தமிழ்நாடு பார்த்தது.
எதிர்க்கட்சித்தலைவரான கழக இளைஞரணிச் செயலாளர் உதயநிதி ஸ்டாலின் அவர்கள் இது குறித்து த.வெ.க. அரசுக்கு சவால் விடும் கேள்விகளை எழுப்பினார். கூட்டுறவு அங்காடிகளில் வழங்கப்படுவதாகச் சொல்கின்ற சன்னரக பொன்னி அரிசி எங்கிருந்து கொள்முதல் செய்யப்பட்டது? கொள்முதல் செய்வதற்கான டெண்டர் எப்போது விடப்பட்டது? என்ன விலைக்கு ஒரு கிலோ அரிசி வாங்கப்பட்டது? மக்களுக்கு ஒரு கிலோ அரிசிக்கு கொடுக்கப்படும் மானியம் எவ்வளவு?
என போலி பொன்னிஅரிசி விற்பனை குறித்து அடுக்கடுக்கானக் கேள்விகளை எதிர்க்கட்சித்தலைவர் எழுப்பி, மூன்று வாரங்கள் கடந்த நிலையிலும், விஜய் அரசிடமிருந்து முறையான பதில் எதுவும் வரவில்லை.
நம்பி வாக்களித்த மக்களின் வயிற்றில் அடித்திருக்கிறார் விஜய். த.வெ.க எம்.எல்.ஏ.க்கள் தங்களிடம் புகார் மனு கொடுக்க வருபவர்களையும் அடிக்கிறார்கள். துணை சபாநாயகர் ரவிசங்கர் நேரடியாக ஒருவரைத் தாக்குகின்ற காட்சி தீபாவளி ரிலீசாக வெளியானது. தாக்கப்பட்ட நபரை சமாதானப்படுத்துவது போல ஒரு போலி வீடியோ, அது 6 டேக் எடுக்கப்பட்டபிறகு வெளியான வீடியோ என்றும் என்னை சபாநாயகர் அடித்தார் என்றும் தாக்கப்பட்டவர் வெளியிட்ட அடுத்த வீடியோ, தாக்கிய சபாநாயகர் மீது எந்த நடவடிக்கையும் எடுக்காமல், தாக்கப்பட்ட நபர் டாஸ்மாக்கில் மது வாங்குவது தொடர்பான சி.சி.டி.வி வீடியோவை வெளியிட்டு பாதிக்கப்பட்டவரையே குற்றவாளியாகச் சித்தரித்த காவல்துறை என்று
ஒரு விவகாரத்தை திசை திருப்பவும், மடைமாற்றவும் அத்தனை அதிகாரத்தையும்தான் பயன்படுத்துகிறது த.வெ.க அரசு. நேர்மையான விசாரணையோ நடவடிக்கையோ இல்லை.
திருவைகுண்டம் த.வெ.க. எம்.எல்.ஏ. சரவணன் மீது அவரது கட்சியைச் சேர்ந்த பெண்மணி பாலியல் புகார் கொடுத்தார். பாதிக்கப்பட்டவருக்கு நீதி கிடைக்கச் செய்யும் நடவடிக்கை இல்லை. மாறாக, இந்த வழக்கில் சம்பந்தப்பட்ட மற்ற குற்றவாளிகளுடன் சமரசம் செய்துவைக்கும் கட்டப்பஞ்சாயத்து வேலையை த.வெ.க அரசின் காவல்துறை மேற்கொண்டது. இராணிப்பேட்டை த.வெ.க மாவட்டச் செயலாளர், அரக்கோணம் ஒன்றிய த.வெ.க செயலாளர் உள்ளிட்டோர் மீது சொந்தக் கட்சியைச் சேர்ந்த பெண்களே பாலியல்
துன்புறுத்தல்கள் குறித்து புகார் தெரிவித்த போதும் இதுவரை எந்த நடவடிக்கையையும் விஜய் அரசு மேற்கொள்ளவில்லை.
சோப்பளாங்கி அரசு என கழகத் தலைவரால் வர்ணிக்கப்பட்ட விஜய் அரசு, ‘தான் சோப்பளாங்கிதான்… சோப்ப ளாங்கிதான்“ என்று ஒவ்வொரு நாளும் நிரூபித்துக் கொண்டே இருக்கிறது. சொந்தக் கட்சியைச் சேர்ந்த பெண்களுக்குப் பாலியல் தொல்லை கொடுத்தாலும் காவல்துறையைக் கையில் வைத்திருக்கும் முதலமைச்சர் விஜய் நடவடிக்கை எடுக்க மாட்டார் என்ற தெனாவெட்டால், மாவட்ட ஆட்சியரான பெண் ஐ.ஏ.எஸ். அதிகாரிக்கே ஆபாச குறுஞ்செய்தி அனுப்பி இருக்கிறார் கள்ளக்குறிச்சி த.வெ.க எம்.எல்.ஏ.
6 மாதங்களில் தமிழ்நாட்டில் அனைத்து வகையான சீரழிவுகளும் பெருகிவிட்டன. சர்வதேச அளவிலான மெத்தபெட்டமைன் போதைப் பொருள் கடத்தலில் ஒன்றிய அரசின் அமைப்புகளால் கைது செய்யப்பட்டிருக்கிறார் நாகை மாவட்ட த.வெ.க நிர்வாகி. அமைச்சர் ஒருவரே மாத்திரையைப் பவுடராக்கும் வீடியோ வைரலானது. அவரைப் பக்கத்தில் அழைத்து நிறுத்தி, ‘போஸ்’ கொடுத்தார் விஜய். “பத்தாது பாட்டில் நான் குடிக்க.. அண்டாவைக் கொண்டா சியர்ஸ் அடிக்க” என்ற தத்துவப் பாடலைப் பாடி ஆடியவரிடம் வேறு என்ன எதிர்பார்க்க முடியும்?
அமைச்சர்களும் எம்.எல்.ஏ.க்களும் தறிக்கெட்டு ஆடுவதை நிறுத்த முடியாத விஜய்யால், பொதுமக்களின் நிம்மதியான வாழ்க்கைக்கும் உத்தரவாதமளிக்க முடியவில்லை. தமிழ்நாட்டின் வரலாற்றில் 30 ஆண்டுகள் கழித்து சிறையிலிருந்து கைதிகள் தப்பி ஓடுவது தொடர்ந்து கொண்டிருக்கிறது. கைதிகள் சுதந்திர மாக இருப்பதால், மக்கள் பதற்றத்தில் இருக்கிறார்கள்.
தீபாவளி பண்டிகை நாளில் மட்டும் 17 கொலைகள் தமிழ்நாட்டில் நடந்துள்ளன. தெருவில் பட்டாசு வெடித்து ரீல்ஸ் எடுத்தவர்களைக் கண்டித்த தேனி சிறப்பு சப்-இன்ஸ்பெக்டரை அடித்தே கொலை செய்திருக்கிறது போதைக் கும்பல். சென்னை அருகே செங்குன்றத்தில் போலீஸ்காரரை ஒரு ரவுடி பட்டாக்கத்தியால் வெட்டுவதையும், பாதுகாப்புக் கருவிகளின்றி பெல்ட்டால் தடுத்து தன் உயிரைப் பாதுகாத்துக் கொள்வதையும் பதற்றத்துடன் பார்த்தது தமிழ்நாடு. நெல்லை மாவட்டம் தாழையூத்தில் காவல் அதிகாரியின் கையை வெட்டிய ரவுடியின் செயல், த.வெ.க ஆட்சியில் அதிகாரம் யார் கையில் இருக்கிறது என்ற அச்சத்தை ஏற்படுத்துகிறது.
முரசு புயலில் சிக்கி சென்னை காசிமேடு மீனவர்கள் 7 பேர் உயிரிழந்த நிலையில், உடல்களை மீட்டு வருவதில் த.வெ.க அரசு காட்டிய அலட்சியம் மீனவ மக்களைக் கொந்தளிக்கச் செய்திருக்கிறது. ஆறுதல் சொல்வதற்குக்கூட ஜோசியர் நேரம் குறித்து தரவேண்டும் என்பது போல அமைச்சர்கள் தாமதமாக வந்து போனார்கள். காவல்துறையோ உயிரிழந்த மீனவர்கள் மீதும் அவர்களின் குடும்பத்தினர் மீதும் வழக்குப் பதிவு செய்து அதிர வைத்தது.
பண்டிகை நாட்களில் கொலைகள் நடப்பது ஏதோ விளையாட்டுப் போட்டி என்பது போல அலட்சியமாகப் பதில் சொல்கிறார் அமைச்சர் ராஜ்மோகன். விலை அதிகம் கொடுத்தும் நல்ல அரிசி கிடைக்கவில்லை என்று மக்கள் சொன்னால், பொன்னி அரிசி சாப்பிடுவது ஒரு ஸ்டேட்டஸ் என நக்கலடிக்கிறார் அமைச்சர் வெங்கட்ராமன். மின்சாரத்தை மிக அதிக விலைக்கு கொள்முதல் செய்து சிக்கியிருக்கும் அமைச்சர் நிர்மல்குமார் அன்றாடம் பொய் மூட்டைகளை அவிழ்த்து விடுகிறார். புளுகுவதில் அமைச்சர் நிர்மல்குமாருக்கும் அமைச்சர் ஆதவ் அர்ஜூனாவுக்கும் இடையே கடும் போட்டியே நடக்கிறது.
விஜய் உள்பட அத்தனை பேரும் தி.மு.க மீது பழிபோடுவதை மட்டுமே கொள்கையாக வைத்துள்ளனர். தங்கள் ஆட்சியில் நடக்கும் எந்த ஒரு முறைகேட்டுக்கும், சட்டம்-ஒழுங்கு சீரழிவுக்கும் பொறுப்பேற்பதில்லை. மக்களின் குமுறல்களைக்கூட காது கொடுத்துக் கேட்பதில்லை. தொழில் வளர்ச்சி-பொருளாதார மேம்பாடு உள்ளிட்ட அனைத்திலும் 6 மாதத்தில் தமிழ்நாடு மோசமாக வீழ்ச்சியடைந்துள்ளது. ஆறே மாதத்தில் தமிழ்நாடே நாசம் என்பதுதான் விஜய்யின் நிர்வாகத் திறன்.